- Giellaguovddážat dahket mađehis stuorra ja dehálaš barggu gelbbolašvuođa nannemiin ja sámegiela geavahemiin sámi báikegottiin. Eanet sámegielgeavaheapmi lea áibbas mearrideaddjin giela ceavzimii ja ovdáneapmái. Mii dárbbašit servodaga mii sámásta ja háliida sámástit, lohka Thomassen. 2014 bušeahtas evttoha Sámediggeráđđi lasihit juolludemiid sámi giellaguovddážiidda 1,3 miljon ruvnnuin. Giellaguovddážat ožžon 2 miljon ruvnnu lassáneami 2013 reviderejuvvon bušeahtas. Giellaguovddážat ožžot dál badjel 14 miljon ruvnnu. Sámediggeráđđi lasiha maiddái oahppostipeandadoarjagiid 600.000 ruvnnuin,  oktiibuot 3 miljon ruvnnu. Dasa lassin lasihuvvojit juolludeamit oktasašsámi giellaovttasbargui Giellagáldui 1 miljon ruvnnuin.

 

Giellakampánja
2013 čavčča várrejuvvo 1,4 miljon ruvnnu giellakampánnjii. - Dán čavčča juo álggahit mii giellakampánnja man áigumuš lea rekrutteret eanet sámi giellageavaheddjiid ja oainnusmahttit sámegiela buorebut, sihke sámi servodagas ja dan olggobealde, dadjá Thomassen. Sámedikki 2014 bušeahtas evttoha sámediggeráđđi lasihit juolludemiid Beaivváš Sámi Teáhterii vel 1 miljon ruvnnuin ja Kárášjoga dáiddárguovddážii 500.000 ruvnnuin. Samien Sijtie oažžu 390.000 ruvnnu lassáneami.